Ndërtuesit “mbushin” arkën e bashkisë Tiranë, 147 mln euro në vitin 2024

Bashkia e Tiranës ka arkëtuar nga ndërtuesit 147 mln euro në vitin 2024.  Vlera e mbledhur është taksa e ndikimit në infrastrukturë.

Ndërtuesit i kanë dhënë buxhetit të bashkisë Tiranë 147 mln euro në vitin 2024. E gjithë shuma, është rezultat i mbledhjes së taksës së ndikimit në infrastrukturë, dhe shkon përtej parashikimeve, pasi vetë bashkia priste të mblidhte 65 mln euro nga ky zë.

Për Tiranën, taksa e ndikikimit në infrastrukturë është në nivelin 8% dhe llogaritet për metër katror mbi çmimet e references, të cilat në vitin 2023 u rritën deri 76% për 32 zonat kadastrale të Tiranës.

Arkëtimi 147 mln euro korrespondon me zgjerimin e lejeve të ndërtimit të cilat kanë pasur vitin e kaluar një vlerë të përgjithshme rreth 1.8 mld euro.

“Viti 2024 rezulton i suksesshëm për arkëtimin e taksës nga ndërtimet e reja, duke arritur vlerën më të lartë të arkëtuar ndër vite me një tejkalim prej 226%”, thuhet në relacionin e bashkisë, ndërkohë që arkëtimet e 2024-s tejkalojnë edhe parashikimet për 2025 dhe 2026, ku bashkia pret të arkëtojë për secilin vit nga 68 milionë euro.

Taksa së ndikimit në infrastrukturë zë 54% të të gjitha detyrimeve që vjel bashkia Tiranë, dhe paguhet nga subjektet ndërtuese që kërkojnë të pajisen me leje zhvillimore dhe leje ndërtimi.

LEXONI GJITHASHTU:

• Rriten çmimet e apartamenteve në Tiranë, 5.000 euro/m² në ish-Bllok
• Çmimet e apartamenteve/ Eksperti: Pse arrijnë deri në 3,000 euro për metër katror