Trump vlerëson marrëveshjen SHBA-Britani, por ngatërron Mbretërinë e Bashkuar me BE

Presidenti amerikan Donald Trump dhe kryeministri britanik Keir Starmer deklaruan se kishin nënshkruar një marrëveshje tregtare që do të shkurtojë tarifat për automjetet britanike dhe industrinë hapësinore, edhe pse menaxhimi i tregtisë së çelikut mbetet një çështje e hapur.

“Sapo e nënshkruam. U bë”, tha Trump, teksa dyshja foli përpara gazetarëve në samitin e grupimit G7, i mbajtur në Kanada. Shefi i Shtëpisë së Bardhë u shpreh se marrëveshja ishte e shumëpritur.

Publikimi i rezultatit megjithatë nuk shkoi edhe aq mirë, pasi Trump i hodhi dokumentet dhe tha se administrata e tij kishte arritur një marrëveshje me BE-në, kur duhet të thoshte Mbretërinë e Bashkuar.

“Është një marrëveshje e drejtë për të dyja vendet, që hap shumë vende pune dhe sjell shumë të ardhura”, tha më tej Trump.

Edhe qeveria britanike deklaroi se marrëveshja heq tarifat amerikane për produktet hapësinore dhe automjetet britanike, me përjashtim të tarifës prej 10 për qind që Trump ka vendosur ndaj të gjitha vendeve.

Sa i takon makinave, që përfshijnë edhe markën prestigjioze “Rolls Royce”, tarifa do të ulet nga 27.5 në 10 për qind dhe në Shtetet e Bashkuara do të hyjnë vetëm 100 mijë automjete britanike në vit.

Pjesa dërrmuese e samitit kaloi e fokusuar tek krizat e ndryshme në Lindjen e Mesme dhe atë në Ukrainë. Nga shprehja e fytyrës së liderëve të vendeve më të industrializuara të botës në atë që njihet si fotoja familjare u duk se palët nuk kishin gjetur gjuhën e përbashkët.