Fëmijët mes raketave, tensionet Izrael-Palestinë, thirrje që të ndalen sa më shpejt sulmet

Me krizën dhe tensionet e shtuara në Lindjen e Mesme, fëmijët janë ata të cilët po e përjetojnë më shumë këtë situatë. Nga hedhja e raketave, më shumë se 12 fëmijë kanë mbetur të vrarë ndërsa shumë të tjerë janë plagosur. Organizata ‘Save The Children’ në Gaza bën thirrje që sulmet të ndalen menjëherë.

Deri më tani fatmirësisht asnjë fëmijë nuk ka vdekur në anën izraelite, por popullsia civile mbetet nën kërcënim të vazhdueshëm me qindra raketa të Hamasit që bien në zonat urbane. Një nga gratë e vrara në Izrael ishte nëna e një fëmije të vogël.

“Fatkeqësisht fëmijët po e përjetojnë në mënyrën më të keqe. Ne dimë që 30 persona kanë vdekur, 12 prej të cilëve janë fëmijë. Unë nuk i kam parë kurrë kaq të frikësuar fëmijët e mi, po shoh se sjellja e tyre po ndryshon. Ata janë gjatë të gjithë kohës duke u dridhur, janë të frikësuar. Kurdo kur dëgjojnë shpërthime, qajnë dhe vrapojnë drejt meje”, thotë Mazen Naim, oficer i ‘Save the Children’ në Gaza.

Gaza nuk ka përjetuar një situatë si kjo për vite me radhë. Ky qytet i vafrër, i mbipopulluar e di shumë mirë se çfarë do të thotë luftë. Rruga kryesore tregtare në qendër të qytetit është pothuajse bosh,  shumica e dyqaneve u mbyllën përpara Fitër Bajramit. Bombardimet nuk u reduktuan, ndërsa zhurma e raketave palestineze dhe sulmet ajrore izraelite vijojnë të jehojnë  në të gjithë rajonin që nga mëngjesi i së martës.