Asnjë i shtruar në spitalin infektiv? Skënder Brataj sqaron lajmin e njoftuar ditë më parë

Drejtori i Urgjencës Kombëtare Skënder Brataj tha në emisionin “Ilva Now” në Euronews Albania se situata e pandemisë në Shqipëri nuk është tërësisht e qetë, pasi ditët e fundit ka pasur një shtim i lehtë i të shtruarve në spitale.

I pyetur nga gazetarja Ilva Tare në lidhje me lajmin e njoftuar se në Spitalin Infektiv pati disa ditë pa të shtruar, Brataj sqaroi se bëhej fjalë vetëm për periudhën kur shërbimin e kishte marrë ky spital, por që nuk kishte domethënien që iu atribuua nga mediat.

“Kemi një kalendar [shërbimi], që një javë e ka Spitali Infektiv [në QSUT], një javë Sanatoriumi… dhe në kohën kur e kishte shërbimin infektivi qëlloi që kishte ditë që nuk pati të shtruar,” – tregoi Skënder Brataj duke shtuar se kjo nuk kishte domethënien që i atribuoi media.

“Ka një rezistencë të qytetarëve që nuk duan të vijnë në Tiranë, por të trajtohen në spitalet rajonale atje ku tashmë ka dhe pajisje dhe staf të kualifikuar. Për fatin e mirë nuk ka forma të rënda siç ka pasur më parë,” – u shpreh Brataj teksa tregoi se 24 orët e fundit ka pasur 14 të shtruar në spitale.

Doktor Brataj këmbënguli se pasojat e grumbullimeve të fushatës zgjedhore duhen pritur edhe dy-tre javë për t’u parë. Megjithatë ai tha se “vala e pritshme nuk do ketë të krahasuar me ato që u kaluan në muajt e parë të vitit”.

LEXONI GJITHASHTU:

• Zv.ministrja Rakacolli: Ende s’është arritur imuniteti i popullatës ndaj COVID-19
• Alimehmeti: Koncepti i imunitetit të komunitetit është i rrezikshëm, infektimi gjithmonë i mundur
• Hyrje-daljet për turizëm, Rakacolli: Mendojmë të mos vendosim masa për ata që do vijnë në Shqipëri
• A ka hyrë varianti indian i coronavirus në Shqipëri? Brataj përgjigjet në “Ilva Now”
• Masa e karantinës për emigrantët para zgjedhjeve, Rakacolli: Jo me prapavijë politike