Droni-insekt, Kina publikon pajisjen e vogël të përgjimit që duket si një mushkonjë

Një institut kërkimor kinez në fushën e mbrojtjes ka publikuar një dron-spiun që ngjason me një mushkonjë. Mikrodroni bionik u paraqit këtë muaj në transmetuesin ushtarak kinez CCTV-7.

Studenti që e mbante në dorë, nga Universiteti Kombëtar i Teknologjisë për Mbrojtjen, sqaroi se robotët bionikë në miniaturë janë të përshtatshëm për fushata mbledhjeje informacioni dhe për misione speciale në fushën e betejës.

Rreth 2 cm e gjatë dhe 0.3 gramë e rëndë, pajisja-insekt ka dy krahë të vegjël dhe tre këmbëza të holla.

Krahët mund të përpëliten deri në 500 herë në sekondë, ndërkohë që pjesa tjetër e trupit përmban sensorë që përdoren për mbikëqyrje dhe operacione ushtarake.

I njëjti ekip shkencëtarësh prezantoi edhe një prototip me 4 krahë që mund të kontrollohet përmes një telefoni smart.

Edhe pse prodhuesit nuk bënë publike se çfarë lloj të dhënash pajisja e re mund të mbledhë, ekspertët thonë se përmasat tejet të vogla të saj e bëjnë të vështirë zbulimin nga sistemet tradicionale të radarëve.

Mikrodronë si këta po bëhen gjithnjë e më të zakonshëm në luftën moderne. Vende të shumta po i eksplorojnë ose po i përdorin këto teknologji në terren.

Për shembull, helikopteri norvegjez që mbahet në pëllëmbë të dorës i quajtur “Grerëza e Zezë”, përdoret nga forca të shumta të armatosura, përfshirë ato amerikane.

LEXONI GJITHASHTU:

• Nën dyshimin për spiunazh, kush janë 3 iranianët që dalin para gjykatës së Londrës
• Irani kryen një valë arrestimesh dhe ekzekutimesh pas konfliktit me Izraelin