Rritja e turizmit, Besnik Vathi tregon strategjinë: Ç’duhet të bëjë Shqipëria

Operatori turistik, Besnik Vathi, tha se Shqipëria qëndroi e hapur në kufijtë e saj, por nuk përfitoi sa duhet për të rritur impaktin tek turizmi.

Ai theksoi e “dogma globale” e pandemisë çoi në uljen e lëvizjeve dhe për pasojë kjo ndikoi në uljen e performancës së sektorit të turizmit.

“Ka presion të madh të qytetarëve shqiptarë për të lëvizur menjëherë. Dogma globale pengoi lëvizjen e lirë të njerëzve. Shqipëria qëndroi e hapur, por nuk pati infeksione më të mëdha, vendet që u mbyllën nuk e kufizuan dot virusin”, tha ai.

Përballë gazetares Ilva Tare, z. Vathi u shpreh se kufijtë e mbyllur nuk krijojnë shanse për  të zhvilluar një turizëm internacional.

“Kur kufijtë janë të mbyllur, nuk mund të flitet për turizëm internacional, sepse turizëm internacional është kur janë kufijtë e hapur.  Shqipëria përfiton sepse ka një emigracion shumë të rritur, i cili pavarësisht pengesave do të vijë se nuk bën në Shqipëri”, tha ai.

Gjatë bisedës në studio, z. Vathi përgëzoi vendimin e fundit të qeverisë shqiptare,  e cila akordoi sot 100 mln lekë të reja për të promovuar Shqipërinë si një vend i sigurt nga pandemia e COVID-19.

Sipas tij, Ministria e Turizmit duhet të lobojë fuqimisht për ta prezantuar vendin me rezultate sa më pozitive.

“Unë e përshëndes ministrin për një vendim që është marrë sot, vendimi i qeverisë për akordimin e 100 mln lekë  të reja për të promovuar Shqipërinë e sigurt për rezultate pozitive për pandeminë, por përsëri nuk është e mjaftueshme, sepse lufta duhet bërë me këto vende që përcaktojnë hartat. Ka vende të ndryshme që bëjnë harta për llogari të vendit të vet. Ministria e Turizmit duhet të lobojë fort me qeveristë e vendeve për ta prezantuar Shqipërinë me sa më shumë rezultate pozitive.”, tha ai.