U shfaq me dorën e mavijosur, çfarë deklarojnë mjekët për shëndetin e Trump

Shtëpia e Bardhë konfirmoi zyrtarisht se Presidenti Donald Trump, po përjeton një ënjtje në pjesën e poshtme të këmbëve dhe mavijosje në dorën e djathtë, pasi një fotografi e publikuar së fundmi i nxirrte në pah kyçet e fryra dhe shenja make-up-i mbi dorën e mavijosur.

Zëdhënësja e Shtëpisë së Bardhë, Karoline Leavitt, gjatë një deklarate për shtyp, lexoi një letër nga mjeku personal i presidentit, Komandanti i Marinës Sean Barbabella. Sipas tij, të dyja shqetësimet janë “të zakonshme për moshën dhe jo të rrezikshme për jetën”.

Sipas mjekut, ënjtja në këmbë vjen nga një gjendje e quajtur insuficiencë kronike venoze, e cila është e zakonshme tek personat mbi 70 vjeç dhe lidhet me qarkullimin e gjakut. Ndërsa mavijosja në dorë, sipas Barbabella-s, është rezultat i shtrëngimeve të shpeshta të duarve dhe përdorimit të aspirinës për parandalimin e sëmundjeve kardiovaskulare.

Sipas mjekut t ë Trump ultratingulli i këmbëve nuk tregoi prani të trombozës venoze të thellë apo probleme arteriale.

Gjithashtu dhe testet e tjera nuk zbuluan dështim të zemrës, probleme me veshkat apo sëmundje sistemike.

Mjekët e jashtëm konfirmuan diagnozën e bërë nga Shtëpia e Bardhë. Dr. Kwame Amankwah, shef i kirurgjisë vaskulare në Universitetin e Connecticut, deklaroi se gjendja mund të menaxhohet me çorape kompresive dhe mbajtjen e këmbëve lart, por nëse lihet pas dore, mund të çojë në ënjtje më të rënda ose ulçera.

Ndërkohë, Dr. Todd Berland nga NYU Langone Health theksoi se: “Kjo është një çështje që prek cilësinë e jetës, por jo jetëgjatësinë.”

Sipas një raporti të mëparshëm mjekësor më 11 prill në spitalin ushtarak Walter Reed, Trump kishte ritëm normal të zemrës dhe nuk paraqiste probleme madhore shëndetësore.

LEXONI GJITHASHTU:

• Trump jo në gjendje të mirë shëndetësore, reagon Shtëpia e Bardhë
• “Në këmbim të armëve amerikane..”, Zelensky i propozon Trump një marrëveshje