Ndahet nga jeta legjenda e boksit shqiptar, Ahmet Golemi

Është ndarë nga jeta në moshën 85-vjeçare, legjenda e boksit shqiptar, Ahmet Golemi. Lajmi është konfirmuar nga i biri në rrjetet sociale.

Ish-boksieri Ahmet Golemi është shpallur 5 herë kampion dhe katër herë nënkampion në vendin tonë, ndërsa e vijoi më tej kontributin e tij në fushën e letrave dhe të gazetarisë sportive, ku do të mbahet mend gjatë si komentatori me zërin e spikatur.

Edhe presidenti Ilir Meta përmes rrjeteve sociale ka reaguar lidhur me lajmin e ndarjes nga jeta të ish-kampionit të boksit.

“Pionier i boksit tonë profesionist, pesë herë kampion dhe katër herë nënkampion, ai sfidoi në “duel” edhe vetë regjimin në emër të mbrojtjes së pasionit të tij, për t’u ringritur sërish më i fortë si shkrimtar i talentuar, gazetar dhe komentator i papërsëritshëm dhe shumë i dashur sportiv.

Mjeshtri i Madh Ahmet Golemi do të mbetet një “universitet” për brezat e sportistëve të rinj shqiptarë, intelektual i rrallë dhe qytetar aktiv, roli i të cilit në çdo pozitë që luajti dhe mbajti, vështirë të zëvendësohet”, shkruan mes të tjerash kreu i shtetit.