Tre të vdekur në Kosovë nga COVID-19

Në Kosovë situata epidemiologjike e COVID-19 raportohet e stabilizuar. Gjatë 24 orëve të fundit kanë humbur jetën 3 qytetarë të konfirmuar pozitivë, ndërsa janë zbuluar edhe 40 raste pozitive, nga 2135 teste të kryera.

Të dhënat e fundit mbi epideminë janë bërë publike nga ana e Institutit të Shëndetit Publik, i cili konfirmon se 358 pacientë janë shëruar, duke bërë që numri total i tyre të shkojë në rreth 100 mijë.

“Numri total i rasteve pozitive është 106.843 raste nga 565.607 persona të dyshimtë në virusin SARS-CoV-2 dhe 2.223 raste të vdekjes.Gjatë 24 orëve të fundit, janë shëruar 358 pacientë derisa numri i përgjithshëm i të shëruarve deri më sot është gjithsej 99.455 raste, kurse numri i rasteve aktive është 5.165”, njofton IKSHPK-ja.

Rastet pozitive janë nga komunat:

Prishtinë 9 raste, Skenderaj 6 raste, Vushtrri 6 raste, Viti 4 raste, Suharekë 3 raste, Drenas 2 raste, Gjakovë 2 raste, Malishevë 2 raste, Rahovec 2 raste dhe me nga një rast komunat Gjilan, Kaçanik, Klinë dhe Pejë.

Qeveria e Kosovës është vënë përballë kritikave nga kundërshtarët politikë në lidhje me procesin e vaksinimit kundër COVID-19.

Sipas tyre, qeveria e drejtuar nga kryeministri, Albin Kurti nuk po bën sa duhet për të përshpejtuar procesin e vaksinimit.