Kryeministri i Izraelit zotohet se do të vazhdojë sulmet ajrore në Gaza

Kryeministri i Izraelit, Benjamin Netanyahu u zotua të shtunën se vazhdojë të përgjigjet me forcë ndaj sulmeve me raketa nga militantët palestinezë në Gaza.

Në një fjalim televiziv, Netanyahu fajësoi grupin e Hamas-it për periudhën e fundit të dhunës vdekjeprurëse, e cila të dielën hyri në ditën e saj të shtatë.

“Javën e kaluar, miliona izraelitë u detyruan të futeshin në strehimoret e bombave ndërsa raketat binin mbi qytetet tona. Disa izraelitë janë vrarë. Shumë të tjerë janë plagosur,” tha ai.

“Izraeli nuk do ta tolerojë këtë. Izraeli është përgjigjur me forcë këtyre sulmeve dhe ne do të vazhdojmë të përgjigjemi me forcë derisa siguria e popullit tonë të rivendoset”,  shtoi ai.

Ai akuzoi Hamasin për “kryerjen e një krimi të dyfishtë lufte” duke synuar civilët izraelitë dhe duke përdorur civilët palestinezë “si mburoja njerëzore”.

Komentet e tij u pasuan me një përshkallëzim dramatik të konfliktit gjatë ditës së djeshme, me Izraelin që bombardoi shtëpinë e një komandanti të lartë të Hamasit dhe shkatërroi një ndërtesë që strehonte mediat ndërkombëtare, përfshirë Associated Press.

Kjo u pasua nga një breshëri e re raketash të Hamas-it.

Java e dhunës vdekjeprurëse u nis nga një sulm me raketa i Hamasit në Jeruzalem, pas javësh tensionesh në rritje dhe masave të ashpra izraelite në Jeruzalemin e kontestuar.

Që nga ajo kohë, Hamas-i ka qëlluar me më shumë se 2.000 raketa, megjithëse shumica kanë rënë ose janë përgjuar nga mbrojtjet anti-raketore.

Aeroplanët e luftës dhe artileria e Izraelit kanë goditur qindra objektiva përreth Gazës, ku jetojnë rreth dy milionë palestinezë.

Lexoni gjithashtu:

Nuk ndalen sulmet në Gaza, goditen zyrat e mediave Associated Press dhe Al Jazeera

Solidaritet e mbështetje, tensionet mes Izraelit e Palestinës shkaktojnë protesta në disa shtete

Etihadi dhe flydubai anulojnë fluturimet drejt Tel Avivit

Kronologji – Hamasi dhe Izraeli: një histori përplasjesh