Rëndohet gjendja e Bruce Willis, aktori nuk mundet më të flasë dhe të ecë

Aktori i njohur i Hollivudit, Bruce Willis, po përballet me një përkeqësim serioz të gjendjes së tij shëndetësore si pasojë e demencës frontotemporale (FTD), një sëmundje degjeneruese që prek aftësitë gjuhësore, sjelljen dhe lëvizjen.

Sipas raportimeve të “The Express”, 70-vjeçari është bërë kryesisht joverbal dhe po përjeton vështirësi “motorike”.

Edhe pse familja nuk ka dhënë detaje specifike për lëvizshmërinë e tij kohët e fundit, thuhet se ai nuk është më në gjendje të flasë dhe të ecë, ndërsa ka humbur dhe aftësinë për të kujtuar pjesë të rëndësishme të karrierës së tij në Hollywood.

Willis u tërhoq nga aktrimi në vitin 2022, pasi iu diagnostikua me afazi – një gjendje që ndikoi në aftësinë e tij për të folur dhe shkruar.

Në vitin 2023, familja konfirmoi se ai vuan nga demenca frontotemporale.

Në një deklaratë të rrallë publike në prill 2025, familja njoftoi se gjendja e tij ishte e qëndrueshme, ndonëse sëmundja është progresive.

Në mars 2025, ish-bashkëshortja e tij, aktorja Demi Moore, ndau në rrjetet sociale momente familjare gjatë ditëlindjes së tij, ku i afërmit ishin mbledhur për t’i dhënë mbështetje.

Karriera dhe pasuria

Bruce Willis u bë një nga yjet më të mëdhenj të Hollivudit në fund të viteve ’80 me filmin “Die Hard” dhe më pas me role në filma të njohur si “The Sixth Sense”, “Pulp Fiction”, “Armageddon” dhe “Unbreakable”.

Në kulmin e karrierës, ai fitonte deri në 20 milionë dollarë për film dhe ka arkëtuar mbi 100 milionë vetëm nga seria “Die Hard”.

Pasuria e tij neto është vlerësuar rreth 250 milionë dollarë deri në vitin 2019, falë kombinimit të fitimeve nga filmat, kontratave reklamuese dhe sipërmarrjeve biznesore.

Familja

Willis ishte i martuar me aktoren Demi Moore nga viti 1987 deri në vitin 2000. Çifti ka tre vajza – Rumer, Scout dhe Tallulah – të cilat janë aktive në rrjetet sociale dhe shpesh ndajnë përditësime për gjendjen e babait të tyre.

Çfarë është demenca frontotemporale?

Demenca frontotemporale është një çrregullim që prek lobet frontale dhe temporale të trurit, të cilat kontrollojnë personalitetin, gjuhën dhe sjelljen.

Simptomat ndryshojnë në varësi të zonës së prekur të trurit dhe përfshijnë ndryshime në personalitet, humbje të të folurit dhe aftësi të dëmtuara motorike.

Shkaku i saktë nuk dihet ende, megjithëse mendohet se faktorët gjenetikë mund të ndikojnë.

LEXONI GJITHASHTU:

• “E di që është puna juaj, por rrini larg”, gruaja e Bruce Willis “sulmon” paparacët
• Bruce Willis heq dorë nga aktrimi për shkak të sëmundjes