Konflikti në ditën e shtatë, vijojnë bombardimet, asnjë shenjë tërheqjeje nga palët

Izraeli bombardoi shtëpinë e liderit të Hamasit në orët e para të së dielës në Gaza, ndërsa grupi islamik u përgjigj me një breshëri raketash ndaj Tel Avivit, duke bërë që konflikti dypalësh të hyjë në ditën e shtatë pa asnjë shenjë zbutjeje.

Të paktën tre palestinezë u vranë kur forcat ajrore izraelite bombarduan enklavën bregdetare dhe shumë të tjerë u plagosën, ndërsa zhurmat e bombardimeve të rënda u dëgjuan përgjatë gjithë natës.

Nga ana e tyre, izraelitët vrapuan për t’u strehuar pasi sirenat e alarmit për raketat në ardhje kumbuan në Tel Aviv dhe periferitë e tij. Rreth 10 persona mbetën të plagosur.

Më herët, kryeministri izraelit Benjamin Netanyahu deklaroi se fushata e bombardimeve do të vazhdojë për sa kohë të jetë e nevojshme.

 “Ne do të vazhdojmë të veprojmë me të gjithë forcën. Po sulmojmë një organizatë terroriste me goditje shkatërruese. Kush ndez konflikt do të marrë përgjigjen e merituar,” – u shpreh Netanyahu.

Ndërsa shefi i lëvizjes së Hamasit, Ismail Haniyeh deklaroi gjatë një tubimi në Doha të Katarit se luftimet kanë si prioritet Jerusalemin.

 “Dua t’ju them të gjithëve ju, këtu nga toka e çmuar e Dohas, se pavarësisht se çfarë keni parë deri tani, ajo që fshihet pas është më e madhe,” – deklaroi Haniyeh.

Të paktën 148 persona janë vrarë në Gaza që kur aktet e dhunës nisën ditën e hënë, përfshirë 41 fëmijë. Nga ana tjetër, Izraeli ka raportuar 10 të vdekur, përfshirë dy fëmijë.

LEXONI GJITHASHTU:

• Kronologji – Hamasi dhe Izraeli: një histori përplasjesh
• Thirrje për paqe, Papa: Fund zhurmës së armëve, ndiqni shtegun e paqes
• Arabia Saudite dënon “shkeljet flagrante” të Izraelit ndaj të drejtave të njeriut në Palestinë