Pika kufitare e Qafë Botës, Dhoma e Tregtisë në Greqi kërkon hapjen e kufirit

Dhoma e Tregtisë së Thesprotise i ka kërkuar Athinës hapjen e pikës doganore te Qafë Botës.

Kësaj here janë vetë grekët që kërkojnë hapjen e kësaj pike të kalimit kufitar.

Bizneset në zonën kufitare me Sarandën dhe Konispolin kanë fitime të mëdha nga lëvizja në të dy anët e kufirit, siç theksoi Dhoma e Tregtisë në letrën e saj, ndërkohë që shtoi gjithashtu se ende nuk ka arsye se përse kjo pikë kufitare qëndron e mbyllur.

Tashmë në Shqipëri ka shumë pak raste të infektimeve apo shtrimeve në spitale me COVID-19. Ndërkohë, në zonën greke vijon me ritme të larta vaksinimi kundër infeksionit COVID.

Më herët edhe bashkitë shqiptare në kufi me Greqinë kanë kërkuar hapjen e pikës kufitare të Qafë Botës si një domosdoshmëri jetike për ekonominë e rajonit.

Korrespondenti i Euronews Albania, Viktor Avdiaj raportoi nga kjo pikë kufitare ku u shpreh se ka shenja pozitive sa i takon situatës duke qenë se në 24 maj ka një mbledhje të qeverisë greke dhe pritet një vendim. Janë të shumtë qytetarët që kanë shprehur përveçse shqetësimin, edhe shpresën se pas pesë ditësh Qafë Bota do të hapet.

LEXONI GJITHASHTU: 

• Kufiri Shqipëri-Greqi, mbyllet Qafë-Bota, në Kakavijë vetëm 400 persona në ditë
• Ulet në mënyrë drastike qarkullimi në Qafë Thanë
• Fillon fluksi në Qafë-Thanë, pas vendimit për heqjen e karantinës së detyrueshme