Ish-kryebashkiaku i New York, Rudy Giuliani pëson aksident të rëndë

Ish-kryebashkiaku i Nju Jorkut, Rudy Giuliani, ka pësuar lëndime serioze pas një aksidenti automobilistik të ndodhur të shtunën mbrëma në shtetin e New Hampshire. Sipas zëdhënësit të tij, 81-vjeçari u transportua menjëherë në spital, ku iu diagnostikua një frakturë vertebrale si dhe plagë të shumta në trup, përfshirë krahun e majtë dhe këmbën e poshtme.

Makina me të cilën po udhëtonte Giuliani u godit nga pas, ndërsa ai ndodhej në zonë për të ndihmuar një grua që raportoi dhunë në familje. Sipas Michael Ragusa, kreu i sigurisë së Giulianit, ish-kryebashkiaku kishte ndërhyrë për të ndihmuar viktimën dhe kishte njoftuar autoritetet përpara se të ndodhte përplasja.

Giuliani, i njohur gjerësisht për rolin e tij si prokuror federal në vitet ’80 dhe më pas si kryebashkiak i Nju Jorkut gjatë periudhës 1994–2001, ka qenë më vonë një figurë aktive në politikën kombëtare. Ai ka shërbyer si këshilltar i afërt i Presidentit Donald Trump dhe është përballur me sfida të shumta ligjore në vitet e fundit, përfshirë humbjen e licencës së avokatit dhe një dëmshpërblim prej miliona dollarësh për shpifje ndaj punonjësve të zgjedhjeve në Xhorxhia.