Rusia shtrihet në Lindjen e Largët, kontrata miliardëshe me Kinën

Në bashkëpunim me Kinën, Rusia po zgjerohet në Lindjen e Largët.

“Gazprom”, kolosi rus i energjisë, ka firmosur kontratën për ndërtimin e gazsjellësit “Fuqia e Siberisë 2” drejt Kinës, si dhe një projekt të ngjashëm me Mongolinë.

Lajmin e bëri të ditur agjencia “Bloomberg”, duke cituar kreun e grupit rus, Aleksey Miller.

Aktualisht, Rusia furnizon Kinën përmes gazsjellësit “Fuqia e Siberisë 1”, me një kapacitet prej 38 miliardë metrash kub gaz në vit.

Nga viti 2027, projekti i quajtur “Aksi i Lindjes së Largët” pritet të shtojë fluksin vjetor të gazit drejt Kinës me 10 miliardë metra kub.

Marrëdhëniet ruso-kineze u konfirmuan edhe në samitin e Shangait, ku presidentët Xi Jinping dhe Vladimir Putin u takuan në Pekin, duke dëshmuar lidhjet e ngushta mes dy vendeve pas pushtimit të Ukrainës nga Moska.

Xi e cilësoi Putinin “mik të vjetër” dhe theksoi se marrëdhëniet mes Kinës dhe Rusisë i kanë rezistuar sfidave gjeopolitike ndërkombëtare, duke përmendur koordinimin strategjik dhe bashkëpunimin me përfitim të dyanshëm.

Nga ana tjetër, Putin falënderoi Xi për pritjen dhe vlerësoi thellimin e marrëdhënieve dypalëshe në nivele të paprecedenta.

Në vijim të samitit, Xi zhvilloi takime dypalëshe me presidentin e Uzbekistanit, kryeministrin e Afganistanit dhe presidentin e Mongolisë, ku u përfshi edhe Putin.

LEXONI GJITHASHTU:

• “Jemi në nivel të paparë”, Putin vlerëson marrëdhënien me Kinën
• Ukraina i bën thirrje Kinës: Të bëhet presion ndaj Rusisë për t’i dhënë fund luftës