Komuniteti ndërkombëtar kërkon zbatimin e vendimit të “Kushtetueses” për Manastirin e Deçanit

Ambasadat e vendeve të QUINT-it ShBA, Britani e Madhe, Franca, Gjermania, Italia, përmes një deklarate kanë kërkuar zbatimin e vendimit të Gjykatës Kushtetuese për tokën e Manastirit të Deçanit.

Në deklaratën e përbashkët të shefave të misioneve thuhet se respektimi i shtetit të së drejtës është një detyrim për të gjitha qeveritë.

“Më 22 Mars, një Qeveri e re u emërua me një mandat të fortë reforme dhe respekt për sundimin e ligjit. Një provë kryesore e vendosmërisë së tij do të jetë zbatimi i vendimit të Gjykatës Kushtetuese të Kosovës në maj 2016 mbi regjistrimin e tokës së Manastirit të Deçanit. Respektimi i shtetit të së drejtës është një detyrim për të gjitha qeveritë. Shefat e Misioneve të Francës, Gjermanisë, Italisë, Mbretërisë së Bashkuar dhe Shteteve të Bashkuara inkurajojnë fuqimisht Qeverinë e Kosovës që të vazhdojë pa vonesa të mëtejshme me regjistrimin e ligjshëm në përputhje me vendimin e Gjykatës Kushtetuese”, thuhet në deklaratën e shteteve të QUINT-it

Gjykata Kushtetuese e Kosovës më 2016 mori vendim, sipas të cilit Manastirit të Deçanit i njihet e drejta e pronësisë për 24 hektarë tokë.

Por, ky vendim nuk është zbatuar asnjëherë nga ana e kësaj komune.

Në vitin 2008, Kuvendi i Kosovës miratoi Ligjin për Zona të Veçanta të Mbrojtura, i cili duhet të sigurojë mbrojtjen e manastireve ortodokse serbe, kishave, vendeve të tjera fetare, si dhe vendeve historike dhe kulturore të një rëndësie të veçantë për komunitetin serb si dhe për komunitetet tjera në Republikën e Kosovës.

Manastiri i Deçanit është njëra nga zonat e mbrojtura, sipas këtij ligji.

Lexoni gjithashtu:

“Manastiri i Deçanit është i sigurt”, Shoshi: “Evropa Nostra” është bërë instrument i propagandës së Serbisë

Reagon Manastiri i Deçanit, Sava Janjiç: Më 2014 kishte propozim tjetër për rrugën Deçan-Plavë