Trump rrit tarifat për vizitorët që shkojnë në SHBA, si ndryshojnë çmimet

Vizitorët në SHBA do të përballen së shpejti me tarifa më të larta për udhëtim, sipas një projektligji të administratës Trump. Ndryshimet prekin Sistemin Elektronik për Autorizimin e Udhëtimit (ESTA), që përpunon aplikimet nga banorët e mbi 40 vendeve pjesë e Programit të Heqjes së Vizave.

Vendet e prekura përfshijnë Mbretërinë e Bashkuar, Australinë, Zelandën e Re, Izraelin dhe shumicën e vendeve evropiane. Tarifa aktuale prej 21 dollarësh për ESTA do të rritet në 40 dollarë duke nisur nga 30 shtatori.

Rritja e tarifave nuk ndalet këtu: udhëtarët që hyjnë në SHBA përmes kufijve tokësorë do të paguajnë më shumë për Regjistrin e Mbërritjes/Nisjes I-94, ku tarifa aktuale prej 6 dollarësh do të ngrihet në 30 dollarë. Për vizitorët nga Kina do të zbatohet gjithashtu një tarifë regjistrimi prej 30 dollarësh për Sistemin Elektronik të Përditësimit të Vizave.

Këto rritje tarifash, së bashku me tarifën e integritetit të vizës prej 250 dollarësh për udhëtarët nga vendet që nuk përfshihen në Programin e Heqjes së Vizave, ndodhin në një periudhë kur udhëtimet ndërkombëtare drejt SHBA-së kanë rënë ndjeshëm. Këshilli Botëror i Udhëtimit dhe Turizmit parashikoi se SHBA do të humbasë 12.5 miliardë dollarë në shpenzimet e vizitorëve ndërkombëtarë gjatë vitit 2025.

Një zëdhënës i Departamentit të Sigurisë Kombëtare tha se tarifa e integritetit të vizës ende nuk është zbatuar, duke shtuar se zbatimi i saj kërkon koordinim ndër-agjencish.

LEXONI GJITHASHTU:

• Tregu i punës në SHBA bie ndjeshëm në gusht, rritet papunësia
• Bastisje në fabrikën e ‘Hyundai’ në SHBA, arrestohen mbi 450 persona