Tregu i punës në SHBA bie ndjeshëm në gusht, rritet papunësia

Tregu i punës në Shtetet e Bashkuara vazhdoi të dobësohet gjatë muajit gusht, duke ndezur alarme të reja mbi gjendjen e ekonomisë më të madhe në botë. Vetëm 22,000 vende pune u shtuan muajin e kaluar, shumë më pak se pritshmëritë e analistëve, ndërsa shkalla e papunësisë u rrit nga 4.2% në 4.3%, sipas të dhënave të publikuara nga Departamenti i Punës.

Shifrat e gushtit përmbyllin një seri të dhënash të paqëndrueshme për tregun amerikan të punës, të cilat kanë shtuar shqetësimet që filluan muajin e kaluar, kur u zbuluan rishikime të konsiderueshme për poshtë të punësimeve në maj dhe qershor. Për herë të parë që nga viti 2020, SHBA raportoi humbje të vendeve të punës në muajin qershor, sipas vlerësimeve të reja.

Këto zhvillime kanë ndryshuar ndjeshëm pritshmëritë në tregjet financiare. Investitorët tani janë pothuajse të bindur se Rezerva Federale do të ulë normat e interesit në takimin e saj të radhës, në përpjekje për të zbutur efektet negative në ekonomi.

“Këmbana paralajmëruese që ra një muaj më parë sapo u bë më e fortë,” tha Olu Sonola, kreu i kërkimit ekonomik për SHBA-në në Fitch Ratings.

Përgjigja e Presidentit Donald Trump ndaj shifrave të dobëta ishte e menjëhershme dhe e ashpër. Ai shkarkoi drejtuesen e Byrosë së Statistikave të Punës, duke e akuzuar atë, pa prova, për manipulim të të dhënave me qëllim dëmtimin e imazhit të tij publik.

Megjithatë, analistët dhe ekonomistët thonë se problemet në tregun e punës janë në pjesë të madhe pasojë e politikave të vetë administratës Trump, përfshirë ndryshimet e ashpra në tarifat tregtare dhe kufizimet e imigracionit. Këto masa, sipas tyre, kanë rritur pasigurinë për bizneset, kanë rritur kostot dhe kanë frenuar punësimin.

Një tjetër faktor negativ ka qenë shkurtimi i shpenzimeve qeveritare, që ka rezultuar në pushimin nga puna të mijëra punonjësve publikë. Vetëm në gusht, qeveria federale shkurtoi 15,000 vende pune. Ndërkohë, sektorët e prodhimit dhe ndërtimit raportuan gjithashtu rënie të pagave, duke anuluar rritjen e punësimeve në sektorin e kujdesit shëndetësor.

LEXONI GJITHASHTU:

• Punonjësit e Bankers Petroleum protestë në Marinzë: S’kërkojmë lëmoshë, por drejtësi
• Bastisje në fabrikën e ‘Hyundai’ në SHBA, arrestohen mbi 450 persona