Punonjësit e Bankers Petroleum protestë në Marinzë: S’kërkojmë lëmoshë, por drejtësi

Dhjetëra punonjës të kompanisë Bankers Petroleum janë ngritur sot në protestë para zyrave të kompanisë në Marinzë, gjatë orarit të pushimit, në një tubim të organizuar nga Sindikata e Sektorit të Hidrokarbureve.

Me pankarta në duar, protestuesit i bënë thirrje drejtuesve të kompanisë që të ndalojnë së injoruari zërin e tyre dhe të marrin parasysh kërkesat kryesore, ndër të cilat: respektimi i të drejtave të punëtorëve, rritja e pagave, zbatimi i kontratës kolektive, ndalimi i intimidimit dhe presionit psikologjik, trajtimi i barabartë i punonjësve, aplikimi i statusit të naftëtarit dhe përmirësimi i kushteve të punës.

Kryetari i Sindikatës, Dritan Shahu, kërkoi një reagim të menjëhershëm nga kompania.

Ndërsa sekretari i Sindikatës së sektorit të hidrokarbureve, dega Fier, Dritan Rrapushi, u shpreh, se nuk kërkojnë lëmoshë por drejtësi sociale.

“Ne nuk kërkojmë lëmoshë, por drejtësi sociale. Prej vitesh kemi qenë të grabitur,” tha ai.

Punonjësit e pranishëm, mes tyre Renato Tahaj dhe Saimir Beraj, theksuan se prej vitesh punojnë në këtë kompani, por vetëm “nëpërkëmben”.

Organizatorët paralajmëruan se nëse kërkesat e tyre nuk merren parasysh, protesta e sotme do të jetë vetëm fillimi i një serie veprimesh më të ashpra, të cilat mund të përshkallëzohen deri në grevë, me pezullimin e aktivitetit.

LEXONI GJITHASHTU: 

• Kundërshtojnë masat e sigurisë, nis në Apel gjyqi për 10 zyrtarët e Bankers
• Bankers pranon vendimin e Arbitrazhit: Do shlyejmë detyrimet ndaj shtetit shqiptar