Moti i keq detyron përkohësisht pezullimin e lundrimit në jug të vendit

Moti i keq ka detyruar autoritetet detare në Shqipëri që të pezullojnë përkohësisht lundrimin në jug të vendit deri në një urdhër të dytë.

Trazimi i detit me dallgë të mëdha që në mëngjesin e sotëm dhe erërat e forta kanë bërë që autoritetet t’u këshillojnë operatorëve turistikë që të mos dalin në det me anije pasi forca e dallgëve shkon deri në 7 ballë.

Prej fillimit të kësaj jave Shqipëria është përfshirë nga moti i paqëndrueshëm me shira kryesisht lokal. Mirëpo ditën e sotme ka pasur shira me densitet të madh në pjesën jugperëndimore dhe perëndimore të vendit duke nisur nga gjiri i Sarandës, Ksamili dhe pjesë të tjera të rivierës në jug.