Amsterdami bëhet qyteti i parë në botë që ndalon reklamat e karburanteve fosile

Amsterdami është qyteti i parë në botë që ka bllokuar reklamat nga kompanitë e karburanteve fosile dhe aviacionit, në përpjekje për të reduktuar numrin e reklamave të karburanteve fosile.

Kjo do të thotë që automjetet me lëndë djegëse fosile, të tilla si makinat dhe avionët me benzinë, nuk do të reklamohen më në stacionet e metrosë në Amsterdam dhe as në qendrën e këtij qyteti.

Ligji i ri ka ardhur si shkak i lëvizjeve masive në kryeqytet dhe rreth tij, të cilat u drejtuan nga iniciativa “Reclame Fossielvrij”. Grupi përgatiti një letër përmes të cilës mbi 50 organizata lokale kërkuan që brenda Amsterdamit të mos përdorej karburant fosil.

“Vendimi për të ndaluar reklamimin e karburanteve fosile në stacionet e metrosë, vjen në një moment vendimtar sa i përket luftës kundër ndryshimeve klimaterike. Reklamat që paraqesin lëndët djegëse fosile si normale, e përkeqësojnë ndryshimin e klimës dhe nuk janë të përshtatshme për një qytet, apo shtet”, tha Femke Sleegers, koordinator i iniciativës “Reclame Fossielvrij”.

Megjithëse fushata holandeze për momentin ka synuar t’i ndalojë këto reklama vetëm në kryeqytet, shenjat tregojnë që e njëjta nismë mund të përhapet në qytete të tjera të mëdha në Holandë, të tilla si Haga, Roterdami dhe Utrecht.