Turizmi në Evropë, Kroacia dhe Spanja gati për sezonin, por turistët mbeten të pakët

Kroacia është ndër vendet e para të Evropës që ka hequr shumicën e kufizimeve për udhëtarët që hyjnë në vend.

Hotelet dhe restorantet po pranojnë turistë që po mbërrijnë gradualisht në prag të sezonit turistik që nis në qershor.

Infeksionet me COVID po bien pas avancimit të procesit të vaksinimit, me zyrtarët që parashikojnë se rreth 50% e 4 milionë banorëve të Kroacisë do të jenë të vaksinuar brenda mesit të verës.

“Sektori i turizmit ka nisur me vaksinimin, të gjithë punonjësit e hoteleve, restoranteve, subjekteve private të akomodimit po vaksinohen, në mënyrë që të jenë të sigurt për turistët. Gjithashtu, kemi ngritur pika testimi për turistët që kur duhet të kthehen në vendin e tyre mund t’u duhet një test COVID-i”, thotë Goran Pavlovic, operator turistik në Kroaci.

Sidoqoftë, suksesi i sezonit turistik do të varet nga rregullat për turistët në vendet e origjinës, si për shembull kërkesa për t’u karantinuar pas kthimit nga pushimet.

Nga e hëna, qytetarët britanikë do të mund të vizitojnë Spanjën pa kufizime apo kritere të tjera shëndetësore, edhe pse Britania e ka vendin iberik në listën e vendeve të parekomandueshme.

“Situata nuk është shumë e gjallë, por është ajo që është. Përveç spanjollëve që vijnë të premte, të shtunë e të diel, nuk ka turistë të tjerë dhe vetëm 2 hotele janë hapur”, shprehet Jose Pardo, pronar restoranti në Spanjë.

Me aprovimin e pasaportës së vaksinimit shpresohet që situata të ndryshojë, edhe pse ka një problem: nëse qeveria britanike s’aprovon dritën e gjelbër, turistët që kthehen në Mbretërinë e Bashkuar do kalojnë 10 ditë në izolim.