‘Marrëzi totale’, babai i Protasevich, gazetarit të arrestuar në Bjellorusi, dënon presionin ndaj të birit

Babai i gazetarit disident Roman Protasevich, i cili u arrestua në Bjellorusi, tha se beson se djali i tij u detyrua që të shfaqej në një video në internet për të pranuar fajësinë dhe dukej se kishte hundën e thyer.

Duke dalë në disa kanale të aplikacionit të mesazheve Telegram të hënën, Protasevich, 26-vjeç, pranoi se ka luajtur një rol në organizimin e trazirave masive në Minsk vitin e kaluar.

Për babanë e tij, Dzmitry Protasevich, komentet në video duket se janë rezultat i detyrimit.

“Ka të ngjarë që hunda e tij të jetë thyer, sepse forma e saj ka ndryshuar dhe ka shumë pudër mbi të. E gjithë pjesa e majtë e fytyrës së tij ka pudër”,  tha Protasevich për Reuters në një intervistë në rusisht të hënën vonë nga Wroclaw e Polonisë, ku ai dhe gruaja e tij jetojnë.

“Nuk janë fjalët e tij, nuk është intonacioni i tij i fjalës. Ai po vepron shumë i rezervuar dhe mund ta shihni se është nervoz”, tha Protasevich për djalin e tij.

Babai shtoi: “Djali im nuk mund të pranojë që krijoi çrregullime në masë, sepse ai thjesht nuk bëri ndonjë gjë të tillë.”

Ministria e Brendshme e Bjellorusisë tha se Protasevich po mbahej në burg dhe nuk ka pasur ankesa për shëndetin tij.

Të hënën, 27 udhëheqësit kombëtarë të Bashkimit Evropian të kërkuan lirimin e menjëhershëm të Protasevich dhe të dashurës së tij Sofia Sapega, si dhe një hetim nga Organizata Ndërkombëtare e Aviacionit Civil.

Ata gjithashtu ranë dakord të vendosnin më shumë sanksione ndaj Bjellorusisë, duke u bërë thirrje linjave ajrore të tyre të shmangin hapësirën ajrore bjelloruse dhe të autorizojnë punën për të ndaluar linjat ajrore bjelloruse nga qielli dhe aeroportet evropiane, tha një zëdhënës.

BE, së bashku me Shtetet e Bashkuara, Britaninë e Madhe dhe Kanadanë tashmë kanë vendosur ngrirjen e aseteve dhe ndalimet e udhëtimit për pothuajse 90 zyrtarë të Bjellorusisë, përfshirë presidentin Alexander Lukashenko, pas zgjedhjeve të gushtit që kundërshtarët dhe perëndimi thonë se ishte një mashtrim.

LEXONI GJITHASHTU:

Devijimi i avionit në Bjellorusi, Rusia i quan reagimet e Perëndimit hipokrizi

Reagime të forta ndaj Bjellorusisë, pasi devijoi avionin për të arrestuar një gazetar opozitar

Bjellorusia devijon fluturimin e Ryanair për të arrestuar kritikun e Lukashenkos