Linjat ajrore shmangin hapësirën ajrore bjelloruse, asnjë reagim nga Lukashenko

Vendosja e flamurit shtetëror bjellorus gjatë një eventi hokeji në Letoni mund të duket diçka e parëndësishme, por dëshmon për izolimin në rritje ndaj Minsk, pasi është një flamur i përdorur të protestat e opozitës.

Zemërimi për atë që BE e ka cilësuar një rrëmbim të sponsorizuar nga shteti të një avioni pasagjerësh për të arrestuar një gazetar të opozitës po sjell pasoja. Sanksionet e nxitura nga Brukseli, duke përfshirë një ndalim të fluturimeve  janë ndjekur nga hapa konkretë pasi linja të shumta ajrore tregtare po shmangin hapësirën ajrore të Bjellorusisë.

Presidenti i Këshillit Evropian Charles Michel prezantoi në Tëitter një hartë të trafikut ajror marrë nga ‘Flighttradar24’, ku tregohej se asnjë avion nuk kalonte në hapësirën ajrore bjelloruse. ‘Evropa në aksion’ shkroi Michel.

Sanksionet shtesë po ndërmerren aktualisht nga BE, një veprim  i mirëpritur nga liderja e opozitës Bjelloruse që ndodhet në ekzil.

“Kjo vëmendje nga shtetet demokratike, politika izoluese e Lukashenko dhe sanksionet, ngritja e vetëdijes për situatën duke organizuar konferenca të ndryshme për Bjellorusinë, me siguri do të çojë në mirëkuptimin se duhet të negociojmë për zgjedhje të reja”, thotë Svetlana Tikhanovskaya, liderja e opozitës bjelloruse.

Shqetësimet janë shtuar pas publikimit të një video të shkurtër të gazetarit të arrestuar, i cili mesa duket rrëfen për akuzat e ngritura ndaj tij nga autoritetet bjelloruse Një foto e marrë nga një video e të dashurës së tij të ndaluar, Sofia Sapega është publikuar  gjithashtu.

Lirimi i tyre është kërkuar gjerësisht nga faktori ndërkombëtar. NATO kërkon hetim emergjent për devijimin e avionit, Këshilli i Sigurimit i OKB pritet të zhvillojë një seancë urgjente.

“Ne duhet ta kemi një mesazh transatlantik dërguar diktatorit në Bjellorusi, Lukashenko. Unë jam i kënaqur që SHBA po punojnë së bashku me BE për këtë çështje. Është qëllimi kryesor për të arritur diplomacinë tonë, që do të ishte parë si një incident ndërkombëtar”, tha ministri i Jashtëm i Lituanisë, Gabrielius Landsbergis

Por Presidenti Bjellorus Aleksandër Lukashenko është mësuar të bëjë presion. Pas muajsh protestash mbi rizgjedhjen e tij, të cilësuar nga opozita si të manipuluar, ai menjëherë u përgjigj me masa shtypëse e brutale.