Ashpërsohet retorika SHBA-Kinë për origjinë e COVID, Biden: Do publikoj raportin

Kina dhe Shtetet e Bashkuara janë përplasur sërish lidhur me hetimin e dytë të agjencive amerikane të inteligjencës mbi origjinën e coronavirusit.

Një ditë pasi presidenti Joe Biden njoftoi publikisht vendimin e tij, Pekini zyrtar ka reaguar duke deklaruar se Amerika nuk ka interes të kryejë një studim shkencor mbi origjinën e COVID-19, por synon të politizojë hetimin në dëm të Kinës.

“Synimi i tyre është ta përdorin pandeminë për të vazhduar stigmatizimin, manipulimin politik dhe për t’ua hedhur fajin të tjerëve, me qëllim që të mbulojnë dështimet e tyre”, tha Zhao Lijian, zëdhënës i Ministrisë së Jashtme kineze.

Zëdhënësi ka shtuar gjithashtu se historia e errët e agjencive amerikane të inteligjencës është ende në mendjet e njerëzve, duke iu referuar konstatimeve të pavërteta që dolën lidhur me armët e shkatërrimit në masë në Irak, që sipas palës kineze, ishin vetëm një justifikim për të pushtuar vendin.

Teksa Organizata Botërore e Shëndetësisë bëhet gati për të nisur fazën e dytë të studimeve mbi origjinën e COVID-19, Kina ka qenë nën presion për t’u dhënë hetuesve më shumë akses për shkak të dyshimeve se virusi rrodhi nga laboratori i specializuar në qytetin e Ëuhanit.

Nga ana e saj, Kina ka mohuar vazhdimisht përgjegjësinë e laboratorit, duke akuzuar Shtetet e Bashkuara dhe vende të tjera për keqinformim.

Por të enjten, kur u pyet nga gazetarët, presidenti Joe Biden deklaroi se ka gjasa që ta publikojë raportin që do të hartojnë shërbimet e inteligjencës.

“Po. Veç nëse ndodh diçka e paparashikueshme”, Joe Biden, president i Shteteve të Bashkuara.

Administrata e kaluar amerikane e drejtuar nga ish-presidenti Donald Trump, akuzoi gjithashtu Kinën si përgjegjëse për shpërndarjen e COVID-19.