Drejtuesit e opozitës në Kosovë takojnë zyrtarët amerikanë për të diskutuar për dialogun me Serbinë

Drejtuesit e partive kryesore të opozitës në Kosovë zhvilluan sot takime të rëndësishme me përfaqësuesit e lartë të SHBA si zëvendës-ndihmës Sekretari i Shtetit, Mattew Palmer dhe ambasadori në Prishtinë Philip Kosnett.

Takimet kishin si temë diskutimi situatën politike, çështjen e dialogut Kosovë-Serbi dhe projektet ekonomike me interes mes Kosovës dhe SHBA-së.

Kryetari i Lidhjes Demokratike të Kosovës (LDK), Lumir Abdixhiku e zhvilloi takimin me ta së bashku me ish-kryeministrin Avdullah Hotin dhe Lutfi Hazirin. Ata i falënderuan përfaqësuesit amerikanë për “përkrahjen e vazhdueshme ndaj Kosovës”.

Abdixhiku ka theksuar se “SHBA-ja është partneri më i fuqishëm në të gjithë proceset e konsolidimit dhe zhvillimit të shtetit të Kosovës”. Në një njoftim për shtyp LDK tha se i paraqiti dy zyrtarëve amerikan qëndrimet për procesin e dialogut, ndërsa zyrtarët amerikanë “falënderuan për konstruktivitetin që LDK-ja ka treguar në formimin e institucioneve”.

Ndryshe kryetari në detyrë i Partisë Demokratike të Kosovës, Enver Hoxhaj, sipas një njoftimi për shtyp, tha se i kërkoi gjatë takimit me Palmer “rol më të madh të SHBA-së në dialogun me Serbinë”. Hoxhaj e ka konsideruar “partner strategjik të Kosovës”.

Takimet me Palmer dhe ambasadorin Kosnett përkojnë me vizitën e të dërguarit të posaçëm të BE-së për dialogun Miroslav Lajçak.

Palmer dhe Lajçak u takuan pak ditë më parë në Bruksel dhe theksuan se diskutuan për Ballkanin Perëndimor dhe në veçanti për dialogun Kosovë-Serbi.

Vizita e tyre, konsiderohet si përpjekje për të ulur në tryezën e bisedimeve, Albin Kurtin dhe Aleksandër Vuçiç, për të rinisur kështu dialogun mes dy vendeve, të ndërprerë në vitin 2020.

Bisedimet pritet të nisin në mesin e muajit qershor. Lidhja Demokratike e Kosovës dhe Aleanca për Ardhmërinë e Kosovës kanë kërkuar që Shtetet e Bashkuara të Amerikës të kenë rol të rëndësishëm në dialogun mes dy vendeve.

Në përfundim të takimeve më 1 qershor, në orën 10:45 dy zyrtarët e lartë, do të kenë një konferencë të përbashkët për shtyp.

Të martën pritet që Palmer të zhvillojë takim të ngjashëm siç bëri me Abdixhikun dhe Hoxhajn edhe me kryetarin e Aleancës për Ardhmërinë e Kosovës, Ramush Haradinaj.

Të tre partitë opozitare në Kosovë, u shprehën se nuk do të zhvillojnë takime me Lajçak pasi diçka të tillë nuk e ka kërkuar asnjë nga palët.

LEXONI GJITHASHTU:

• Dialogu Prishtinë-Beograd, Miroslav Lajçak viziton sot Kosovën