Broja shpëton Burnley-n, Scott Parker e lavdëron pas barazimit ndaj Bournemouth

Trajneri i Burnley-t, Scott Parker, ka vlerësuar performancën e sulmuesit shqiptar Armando Broja, i cili shënoi golin vendimtar që siguroi një pikë të rëndësishme në transfertë ndaj AFC Bournemouth.

Broja realizoi golin e parë me fanellën e Burnley-t, duke dhënë një ndihmesë të madhe për skuadrën dhe duke i dhënë fund një serie rezultatesh jo pozitive.

“Është një pikë e shkëlqyer për ne. Duhej t’i jepnim fund serisë që kishim nisur. Lojtarët, dhe veçanërisht Armando, ishin të denjë për këtë pikë. Ishim konkurrues dhe e merituam rezultatin,” tha Parker, duke theksuar rolin e Brojës.

Trajneri anglez nuk harroi të përmendë edhe kontributin e zëvendësuesve:

“Ishte një krosim fantastik nga Marcus dhe një përfundim i shkëlqyer nga Armando. Të dy dhanë shumë, por mbi të gjitha jam i kënaqur për të gjithë grupin.”

Për Parker, Broja dhe shokët e tij treguan shpirt luftarak dhe pasion:

“Ky grup burrash dha gjithçka në fushë, dhe Armando ishte një pjesë e madhe e kësaj.”