Bllokada e fermerëve grekë përshkallëzohet para Vitit të Ri, 3 mijë traktorë parkohen në autostradë 

Në të gjithë Greqinë, fermerët vazhdojnë të bllokojnë rrugët me mijëra traktorë, të cilët janë lënë të kalueshëm në të paktën një korsi, dhe vendimet kryesore për vazhdimin e protestës do të merren këtë fundjavë, raporton “Kathimerini”. 

Fermerët theksojnë se “nuk kanë marrë asnjë garanci konkrete nga qeveria” se kërkesat e tyre do të plotësohen, prandaj ata ende qëndrojnë në barrikada.

Sipas fermerëve, rreth 3,000 traktorë janë parkuar në autostradën E65, por trafiku nuk është ndërprerë, pasi një ose dy korsi janë lënë të hapura për trafikun në të gjitha rrugët kombëtare, gjë që lejon lëvizjen e qetë gjatë festave të Krishtlindjeve, të cilat festohen në Greqi sipas kalendarit Gregorian.

Siç është njoftuar, fermerët do të marrin një vendim për vazhdimin e protestës nesër në orën 12:00, te bllokada pranë Nikeas.

“Ky takim është një pararendës i takimit kombëtar që pritet të mbahet të dielën”, thanë fermerët, duke theksuar se në atë takim do të vendoset nëse dhe si do të forcohen bllokadat. Nikea konsiderohet “barometri” i bllokadave bujqësore, sepse është më e madhja në vend dhe mbledh më shumë njerëz.

Qeveria greke theksoi se nga 27 kërkesat e fermerëve, “16 janë zgjidhur, katër janë në shqyrtim, ndërsa shtatë nuk mund të plotësohen”, por fermerët këmbëngulin se nevojiten “përgjigje konkrete” dhe një dialog kuptimplotë me qeverinë.

Fermerët në Greqi po protestojnë për vonesën në pagesat e subvencioneve nga BE-ja, kompensimin që u detyrohet shteti, ristrukturimin e borxhit, blerjet e karburantit pa taksa dhe një paketë masash për të zgjidhur rrethanat e vështira që i pllakosën këtë vit.