Shkrumbohet një banesë në Elbasan, dyshimet e para për shkaqet e zjarrit

Një shtëpi është shkrumbua plotësisht nga zjarri në fshatin Murras, në Elbasan. Fatmirësisht nuk raportohet për persona të lënduar, por tre banorët e saj kanë mbetur pa strehë, duke u përballur tashmë me pasojat e rënda të humbjes së banesës.

Paraprakisht dyshohet se zjarri ka nisur nga një shkëndijë elektrike në pajisjet elektro-shtëpiake, ndërsa përhapja e shpejtë e flakëve është favorizuar nga çatia prej druri dhe veshja e jashtme e banesës me polisterol.

Ndërhyrja e shërbimit zjarrfikës ka qenë e vështirë për shkak të terrenit malor dhe largësisë gjeografike. Një ditë më parë, dy shtëpi u dogjën totalisht në lagjen “Aqif Pasha” në Elbasan.

Zjarri nisi në njërën prej banesave ku jetonte një person dhe më pas u përhap edhe në një shtëpi tjetër të pabanuar. Ndërtesat, të vjetra dhe kryesisht me çati druri, u përfshinë lehtësisht nga flakët, ndërsa zjarrfikësit u përqendruan në shpëtimin e banesave ngjitur, të cilat rrezikuan seriozisht.