Operacion pas Venezuelës edhe në Kolumbi? Trump: Më duket ide e mirë

Presidenti amerikan, Donald Trump  pas operacionit të zhvilluar dy ditë më parë në Venezue po kërcënon hapur një vend tjetër.

Duke folur me gazetarët në Air Force One në fluturimin nga Mar-a-Lago për në Uashington, presidenti amerikan tha se Kolumbia drejtohet nga një “njeri i sëmurë” që i pëlqen të prodhojë kokainë dhe ta shesë atë në Amerikë.

Ai parashikoi se Gustavo Petro nuk do të qëndrojë në pushtet për shumë kohë, dhe kur u pyet nëse një operacion i ngjashëm me sulmet në Venezuelë do të kryhej në Kolumbi, Trump tha se i duket si një ide e mirë.

Në të njëjtën kohë, ai tha se duhet të bëjë diçka për Meksikën.  Presidenti amerikan pohoi se përparësia e tij tani është të rregullojë Venezuelën, e cila aktualisht sipas tij është një vend i vdekur. Ai theksoi se SHBA-të duan akses të plotë në fushat e naftës .

“SHBA-të do të kujdesen për Venezuelën dhe popullin e saj, por edhe për ata që jetojnë në vendin tonë sepse u detyruan të largohen”, tha ai.

Ai u tha gjithashtu gazetarëve se ushtarët që u plagosën gjatë kapjes së Nicolas Maduros janë të gjithë në gjendje të mirë. Të dielën, Kuba njoftoi se 32 qytetarë të saj u vranë në operacionin për kapjen e Maduros, pa hyrë në detaje rreth rolit që ata kishin në Karakas.