Situatë kritike në ish-Kënetë, shtëpitë ende të përmbytura në Durrës

Moti i keq me reshje të dendura shiu që ka përfshirë vendin tonë solli probleme të shumta me përmbytjet në disa qytete, duke vijuar edhe ditën e sotme. Gjirokastra, Durrësi dhe Lezha janë qytetet që kanë situatën më të rëndë për shkak të prurjeve të mëdha të reshjeve.

Ndërkohë, gazetarja e Euronews Albania, Lorida Mani, nga Durrësi, për situatën në qytet ditën e sotme tha se reshjet e shiut kanë paralizuar jetesën për banorët. Sakaq, ajo theksoi se situata vijon të jetë kritike në zonën e ish-Kënetës, në Spitallë dhe në Nishtullë.

“Banorët e ish-Kënetës nuk kanë pasur ndihma nga shërbimet emergjente apo qoftë nga forcat ushtarake, ndërkohë uji vazhdon të jetë në lagje dhe brenda banesave. Për sa i përket situatës në Spitallë dhe Nishtullë, edhe aty vijon të jetë problematike, ndërsa në rrugët e qytetit situata ka shkuar drejt normalizimit dhe uji është tërhequr. Mëngjesin e sotëm ka shkuar drejt normalizimit aksi kombëtar Tiranë-Durrës, ku ditën e djeshme ka qenë situata serioze, ku u shkaktua dhe trafik i rëndë. Gjithashtu, trafiku vijoi edhe në rrugët e qytetit. Ndërkohë, procesi mësimor është pezulluar edhe ditën e sotme nga çerdhet deri te universitetet”, u shpreh gazetarja.

Ndërkohë, situatë e rëndë për Durrësin u shënua edhe ditën e djeshme, ku për shkak të prezencës së madhe të reshjeve, përveç përmbytjeve të shtëpive dhe bizneseve, situatë emergjente u regjistrua edhe në Burgun e Durrësit. Si pasojë, rreth 800 banesa u prekën nga prezenca e ujit, ndërsa 180 persona u evakuuan për shkak të rrezikut. Si sot, ashtu edhe ditën e djeshme, u pezullua mësimi në të gjitha shkollat e qytetit.