Situatë kritike nga përmbytjet në Novoselë, Vjosa arrin kuotën 8 metra

Situata në Novoselë është bërë kritike në orët e pasdites së të mërkurës, pasi lumi Vjosë ka arritur kuotën 8 metra.

Autoritetet paralajmërojnë se orët në vijim do të jenë të vështira dhe bëjnë thirrje që të gjithë banorët e zonës të tregojnë kujdes maksimal.

Strukturat vendore janë në terren dhe po monitorojnë situatën nga afër, ndërsa masat për garantimin e sigurisë së banorëve do të vijojnë të zbatohen gjatë gjithë kohës që lumi mbetet në nivele të larta.

Banorët u bëhet thirrje të shmangin zonat pranë ujërave dhe të ndjekin udhëzimet e autoriteteve.

Prej së martës, reshjet e dendura të shiut kanë krijuar vështirësi në qarkullim, veçanërisht në jug të Shqipërisë.

Në fshatin Vajzë të Vlorës, si pasojë e reshjeve të fundit, aksi rrugor Kotë–Sevaster ka pësuar një rrëshqitje dherash, duke u bllokuar plotësisht për qarkullimin e automjeteve.

Autoritetet u kanë bërë thirrje banorëve dhe drejtuesve të mjeteve të shmangin lëvizjen në këtë segment rrugor dhe të përdorin rrugë alternative, deri në normalizimin e situatës.