Situata e rreshjeve në Berat: Përmbyten 15 banesa dhe një shkollë, evakuohen 6 familje

Reshjet e shumta të shiut kanë përfshirë qarkun e Beratit, duke sjellë përmbytje dhe dëme të konsiderueshme në disa zona. Zonat më të prekurat janë Dimali dhe Kuçova.

Në bashkinë Dimal, përmbytjet kanë përfshirë 15 banesa në lagjet “Dafina” dhe “Guri i Bardhë”, si dhe shkollën Muhamer Janina. Në fshatin Çiflik janë raportuar përmbytje në tokat bujqësore. Deri më tani janë evakuuar 6 familje, ndërsa në ndihmë janë angazhuar edhe Forcat e Armatosura.

Ndërkohë, në bashkinë Kuçovë, lumi Osum ka dalë nga shtrati në fshatin Tapi, duke përmbytur sipërfaqe të mëdha toke.

Autoritetet vendore dhe emergjencat civile ndodhen në terren për menaxhimin e situatës.