Balluku zbret në terren për përmbytjet: Jemi angazhuar maksimalisht

Zëvendëskryeministrja dhe ministrja e Infrastrukturës dhe Energjisë, Belinda Balluku, ka zbritur këtë të enjte në terren, duke inspektuar nga afër situatën në Urën e Mifolit, ku po zhvillohet operacioni i evakuimit në Novoselë.

Balluku është informuar nga strukturat përgjegjëse për ecurinë e operacionit, masat e marra për garantimin e sigurisë së qytetarëve si dhe për ndërhyrjet teknike që po kryhen në zonë. Sipas burimeve zyrtare, evakuimi po realizohet në bashkëpunim me emergjencat civile, forcat e rendit dhe autoritetet lokale.

“Kemi angazhimin edhe për shpëtimin e gjësë së gjallë. Kryeministri po dizenjon një paketë që do garantojë dëmshpërblimin si për pjesën bujqësore dhe banesat. Nesër do ketë një mbledhje të komitetit të emergjencave ku do bëhet edhe një adresim nga kryeministri jo vetëm për zgjidhjen e situatës, por edhe për aspektet e rëndësishme që duhen bërë të ditura. Në këtë moment u bëjmë thirrje dhe kërkojmë qytetarëve t’u përgjigjen thirrjeve të emergjencave civile. Duhet të marrim masa edhe më të shpejta se situata që mund të agravojë. Kemi shpresë për një rënie të Vjosës që afektohet edhe nga reshjet në Greqi në këto momente, por shpresojmë në orët e ardhshme”, tha ajo.