Trump: Do ta qeverisim Venezuelën për një kohë të gjatë, do përdorim naftën dhe do ta importojmë

Donald Trump ka deklaruar se kontrolli që Shtetet e Bashkuara do të ushtrojnë ndaj Venezuelës mund të zgjasë për vite të tëra.

“Vetëm koha do ta tregojë”, ka thënë Trump, i intervistuar nga gazeta “Neë York Times”.

I pyetur nëse gjendja në fjalë do të zgjaste tre muaj, 6 muaj, një vit apo më shumë, presidenti amerikan është përgjigjur: “Druhem se do të jetë shumë më gjatë”.

“Do të rindërtojmë vendin në mënyrë të leverdishme. Do të përdorim naftën dhe do ta importojmë. Do të ulim çmimin e saj dhe do t’i japim Venezuelës të ardhura, për të cilat ka aq shumë nevojë”, ka thënë Trump.

Ndërkohë, detaje të reja kanë dalë në dritë mbi operacionin e fundjavës së kaluar të forcave speciale amerikane në Venezuelë, që çoi në kapjen e liderit të vendit, Nicolas Maduro.

Sipas të dhënave të fundit, bilanci i operacionit të operativëve të forcave Delta ka shkuar në 100 viktima.

“Deri tani janë 100 të vdekur dhe një numër i përafërt të plagosurish. Sulmi ndaj vendit tonë ishte i tmerrshëm”, ka deklaruar ministri i Brendshëm Diosdado Cabello.

Gjithashtu, ministri ka bërë të ditur se Maduro dhe bashkëshortja e tij Cilia Flores mbetën të plagosur gjatë blicit të 3 janarit.

“Cilia u plagos në kokë dhe mori një goditje në trup, ndërsa i shoqi, Nicolas, u plagos në këmbë. Për fat të mirë, ata po e marrin veten nga plagët”, shtoi Cabello.