Një i vdekur nga stuhia “Goretti” në Britani, mijëra njerëz pa energji elektrike

Stuhia Goretti përfshiu Cornwall-in jugperëndimor dhe pjesë të Uellsit gjatë natës nga e enjtja deri të premten, me erëra që arrinin deri në 160 km/orë, sipas autoriteteve të Mbretërisë së Bashkuar. Erërat e forta rrëzuan pemë dhe dëmtuan infrastrukturën e energjisë, duke lënë dhjetëra mijëra shtëpi pa energji elektrike dhe duke vrarë një burrë.

Burri rreth të 50-ave u gjet i vdekur në zonën Mawgan të Helston të enjten në mbrëmje, kur një paralajmërim i kuq për erëra “të rrezikshme dhe të stuhishme” ishte në fuqi në të gjithë Cornwall-in.

Policia e Devonit dhe Cornwallit tha se shërbimet e emergjencës u thirrën rreth orës 19:35 të enjten dhe të premten filluan punimet për heqjen e pemës. Vdekja e burrit nuk po trajtohet si e dyshimtë dhe të afërmit e tij janë informuar.

Paralajmërimet për borë dhe stuhi të fuqishme mbeten në fuqi në pjesën më të madhe të Mbretërisë së Bashkuar të shtunën, ndërsa dhjetëra mijëra njerëz janë ende pa energji elektrike pasi stuhia goditi vendin.

Paralajmërimet do të vazhdojnë edhe të dielën, ku është njoftuar një mundësi e madhe për ndërprerje të trafikut hekurudhor në të gjithë Anglinë, Uellsin dhe Skocinë, tha National Rail.