Qeveria e Groenlandës: Po punojmë për t’u mbrojtur nga NATO, e hedhim poshtë idenë e Trumpit

Qeveria në Groenlandë njoftoi sot se do të shtojë punën për të siguruar që mbrojtja e territorit të Arktikut të zhvillohet nën kujdesin e NATO-s dhe hodhi poshtë përsëri idenë e Presidentit të SHBA-së, Donald Trump, që Uashingtoni të marrë kontrollin e Groenlandës.

“Të gjitha vendet anëtare të NATO-s, përfshirë Shtetet e Bashkuara të Amerikës, kanë një interes të përbashkët në mbrojtjen e Groenlandës”, njoftoi Qeveria e Groenlandës, raporton Reuters.

Trump tha të premten se SHBA-të do të ndërmarrin veprime për Groenlandën, “pavarësisht nëse na pëlqen apo jo”.

Ai theksoi se SHBA-të do të bëjnë diçka me Groenlandën, “qoftë në një mënyrë të mirë ose në një mënyrë të vështirë”.

Administrata amerikane ka refuzuar vazhdimisht të përjashtojë përdorimin e forcës ushtarake, pavarësisht se Danimarka dhe Groenlanda janë aleate të NATO-s.

Kryeministrja daneze Mette Frederiksen deklaroi më parë se Danimarka ndodhet në një moment fatal për shkak të kërcënimit të Presidentit të SHBA-së Donald Trump për të marrë territorin autonom danez të Groenlandës, ndërsa akuzoi Shtetet e Bashkuara se potencialisht do t’i kthejnë shpinën NATO-s.

“Rreziku është më i lartë nga sa mund të shihet në shikim të parë, sepse nëse ajo që përjetojmë nga amerikanët është se ata në fakt i kthejnë shpinën aleancës perëndimore, se ata i kthejnë shpinën bashkëpunimit tonë me NATO-n duke kërcënuar një shtet anëtar, gjë që nuk e kemi përjetuar më parë, atëherë kjo do të ndalet”, tha Frederiksen.