Administrata Trump i jep fund statusit të mbrojtjes së përkohshme për somalezët në SHBA

Administrata Trump po i jep fund statusit të mbrojtjes së përkohshme (TPS) somalezëve që jetojnë në Shtetet e Bashkuara, duke u dhënë qindra njerëzve dy muaj kohë për t’u larguar nga vendi ose do të përballen me deportim.

Sekretarja e sigurisë kombëtare, Kristi Noem tha se kushtet në vendin e Afrikës Lindore ishin përmirësuar mjaftueshëm dhe se somalezët nuk kualifikoheshin më për këtë përcaktim sipas ligjit federal.

Vendimi për të hequr TPS-në për somalezët në SHBA prek 705 shtetas somalezë. Ata kanë kohë deri më 17 mars para se statusi i tyre të skadojë. Burime anonime të imigracionit përmendën shifra më të larta për Fox News, rreth 2,471 përfitues aktualë dhe 1,383 aplikime të tjera.

TPS u jepet nga Departamenti i Sigurisë Kombëtare shtetasve të huaj që nuk mund të kthehen në mënyrë të sigurt në vendet e tyre të origjinës për shkak të konfliktit të armatosur, fatkeqësive natyrore ose rrethanave të tjera të jashtëzakonshme.

Mbrojtja u lejon individëve të jetojnë dhe punojnë ligjërisht në SHBA derisa kushtet të përmirësohen në atdheun e tyre. Somalezëve iu dha për herë të parë TPS nga administrata e George HW Bush në vitin 1991 gjatë luftës civile në Somali.

Statusi është rinovuar vazhdimisht nga administratat e njëpasnjëshme, së fundmi nga Joe Biden në shtator 2024, i cili e zgjati atë deri në mars 2026.

Somalia mbetet e prekur nga dhuna e vazhdueshme nga militantët e al-Shabaab, kushtet e rënda të thatësirës dhe krizat humanitare të përhapura që kanë zhvendosur miliona njerëz brenda vendit, sipas raporteve të OKB-së.

Organizatat e të drejtave të njeriut kanë paralajmëruar se kthimi i shtetasve somalezë në vend mund t’i vërë ata në rrezik të madh.