U fundosën me anije në Indonezi, pesë persona gjenden gjallë pas katër ditësh në det

Pesë persona që rezultonin të zhdukur pas fundosjes së një anijeje pasagjerësh në provincën Sulawesi Jugor të Indonezisë janë gjetur gjallë, pasi arritën të mbijetojnë për katër ditë në det.

Sipas mediave lokale, të mbijetuarit u shpëtuan pranë ishullit Matallang, pasi u pikasën të shtunën nga ekuipazhi i një anijeje peshkimi që po kalonte në zonë. Ata u gjetën duke qëndruar mbi ujë dhe duke u mbajtur pas një pajisjeje për grumbullimin e peshkut, e përdorur nga peshkatarët vendas, e cila u kishte shërbyer si mjet mbijetese.

Anija u fundos të mërkurën, ndërsa deri më tani autoritetet kanë konfirmuar një viktimë. Pas aksidentit, 24 persona rezultuan të zhdukur, ndërsa pesë prej tyre tashmë janë shpëtuar.

Të mbijetuarit janë transportuar për të marrë ndihmë mjekësore dhe po i nënshtrohen ekzaminimeve të mëtejshme për të vlerësuar gjendjen e tyre shëndetësore.

Ndërkohë, operacioni i kërkim-shpëtimit vijon për gjetjen e personave të tjerë të zhdukur. Autoritetet indoneziane kanë angazhuar anije dhe personel shtesë, duke zgjeruar zonën e kërkimit në përpjekje për të gjetur sa më shumë të mbijetuar.