Sekretarja e Sigurisë: E vendos Trump nëse aktivizon Aktin e Kryengritjes në Minesota! Është si opsion

Sekretarja e Departamentit të Sigurisë Kombëtare, Kristi Noem bëri me dije se e ka diskutuar Aktin e Kryengritjes me presidentin Donald Trump, pasi ai kërcënoi ta aktivizonte atë në Minesota. Noem tha se vendimi i takon atij.

“Këtë mëngjes diskutova me Presidentin disa gjëra me të cilat po merremi në kuadër të departamentit dhe operacioneve të ndryshme. Diskutuam Aktin e Kryengritjes; ai sigurisht që ka autoritetin kushtetues për ta përdorur atë”, u tha Noem gazetarëve në Shtëpinë e Bardhë.

Noem nuk e përshkroi situatën në Minneapolis si një kryengritje por një dhunë dhe shkelje e ligjit në shumë vende.

Ajo gjithashtu ia vuri përgjegjësinë guvernatorit të Minesotës, Tim Walz, për përmirësimin e situatës në terren duke bashkëpunuar me autoritetet federale.

“Nëse gjërat nuk përmirësohen me Guvernatorin Walz, nuk parashikoj që rrugët të bëhen më të sigurta. Guvernatori Walz dhe ekipi i tij udhëheqës duhet të vijnë tek ne dhe të zbulojnë se si mund të bashkëpunojmë, siç kemi bërë në shumë shtete të tjera”, tha Noem.

Sa i përket operacioneve të administratës ICE, Noem tha se nuk ka plane për t’u tërhequr nga Minesota.