SHBA paralajmëron Kubën që të mos bllokojë ndihmat humanitare për të prekurit nga uragani “Melissa”

Një zyrtar i lartë i Departamentit të Shtetit paralajmëroi autoritetet kubaneze që të mos bllokojnë hyrjen e një dërgese me ndihmë humanitare. Zyrtari la të kuptohej se nëse Havana nuk i bindet kërkesës, Presidenti i SHBA-së Donald Trump mund të ndërmarrë veprime kundër saj.

Paralajmërimi i Jeremy Lewin erdhi ndërsa SHBA-të përgatiten të dërgojnë 3 milionë dollarë ndihmë për ata që janë prekur nga uragani Melissa, i cili goditi ishullin në tetor.

“Kjo është hemisfera jonë dhe, siç tha presidenti pas operacionit për kapjen e Nicolas Maduro, e dini, sovraniteti amerikan në hemisferën tonë nuk do të vihet më kurrë në pikëpyetje”, tha Lewin.

Ndihma do të shpërndahet nëpërmjet Kishës Katolike Kubane dhe misioni po monitorohet nga afër nga Departamenti i Shtetit.

Ministria e Jashtme Kubane e përshkroi misionin si oportunist dhe manipulim politik, por vuri në dukje se do ta pranonte donacionin pa kushte, duke e konsideruar atë si të ardhur nga populli amerikan dhe do të siguronte përdorimin e tij të duhur.

Trump u zotua të ndalojë rrjedhën e naftës dhe parave nga Venezuela në Kubë pas operacionit të 3 janarit që kapi Maduron.

Uashingtoni njoftoi se ndihma humanitare do të dërgohej me dy aeroplanë çarter nga Miami, duke siguruar se ishin marrë masa të jashtëzakonshme për të siguruar që ajo do të arrinte te populli kubanez direkt pa ndërhyrjen e regjimit të paligjshëm në Havana. Sipas Departamentit të Shtetit, afërsisht 6,000 familje do të përfitojnë nga ndihma.