Përplasi për vdekje këmbësoren në Belsh, arrestohet 20-vjeçari

Policia këtë të enjte ka vënë në pranga një 20-vjeçar pasi dyshohet se është autori kryesor i aksidentit të ndodhur ditën e djeshme në Rrenas të Belshit, ku për pasojë ka humbur jetën një këmbësoren dhe ngeli e plagosur nëna e drejtuesit të automjetit.

Sipas raportimeve nga policia, 20-vjeçari është arrestuar për veprën penale “Drejtimi i automjeteve në mënyrë të parregullt”, me pasojë vdekjen.

Njoftimi i plotë i policisë:

“Në vijim të informacionit paraprak të dhënë dje, për aksidentin e ndodhur në Rrenas, Belsh, si pasojë e të cilit humbi jetën shtetasja Rr. T., informojmë se në vijim të veprimeve procedurale, specialistët e Qarkullimit Rrugor arrestuan në flagrancë për veprën penale “Drejtimi i automjeteve në mënyrë të parregullt”, me pasojë vdekjen, drejtuesin e automjetit, shtetasin K. I., 20 vjeç, banues në Belsh. Nga ky aksident është dëmtuar edhe pasagjerja në automjetin e shtetasit K. I., nëna e tij, e cila është jashtë rrezikut për jetën. 

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme”, thuhet në njoftim.