Përmbyset varka në Britani, humbin jetën tre turistë francezë

Një varkë që transportonte 25 turistë francezë është përmbytur në brigjet e Omanit, duke shkaktuar vdekjen e tre personave, njoftoi Policia Mbretërore e Omanit.

Sipas autoriteteve, incidenti ndodhi më shumë se dy milje e gjysmë detare nga kryeqyteti Muskat, kur varka u përmbys për arsye ende të paqarta. Viktimat u mbytën në det, ndërsa dy turistë të tjerë pësuan lëndime të lehta. Në bord ndodheshin gjithashtu një guidë turistike dhe kapiteni i mjetit lundrues.

Policia bëri të ditur se hetimet janë në vijim për të përcaktuar rrethanat e sakta të aksidentit. Ndërkohë, në një postim në rrjetin social X u publikuan pamje që tregonin trupin e varkës së përmbysur duke notuar në ujë.

Sipas gazetës Oman Daily Observer, varka ishte nisur drejt Ishujve Ad Dimaniyat, një destinacion i njohur turistik rreth 16 kilometra larg kontinentit, i famshëm për zhytjen me maskë. Incidenti raportohet të ketë ndodhur rreth orës 09:00 të mëngjesit, pasi kushtet detare u përkeqësuan papritur.

Një zëdhënës i një operatori turistik deklaroi se, me mbërritjen e ekipeve të shpëtimit, shumë turistë ishin nxjerrë tashmë nga uji nga anije të tjera turistike dhe nga Roja Bregdetare, duke qenë në gjendje të mirë shëndetësore. Shumica e të plagosurve ishin të moshuar dhe vuanin nga paniku dhe të ftohtit si pasojë e ekspozimit në ujë. Disa prej tyre u trajtuan me oksigjen deri në stabilizimin e gjendjes.

Trupat e tre viktimave u transferuan tek autoritetet përkatëse për përfundimin e procedurave ligjore. Zëdhënësi shtoi gjithashtu se disa pasagjerë nuk kishin veshur jelekë shpëtimi gjatë udhëtimit.