Oda Amerikane paralajmëron: Ndërprerjet e furnizimit me mallra kërcënojnë bizneset në Kosovë

Oda Ekonomike Amerikane në Kosovë ka shprehur shqetësim për çrregullimet në lëvizjen e mallrave midis Bashkimit Evropian, korridoreve rajonale të tranzitit dhe Kosovës.

Në një reagim të publikuar, Oda i ka bërë thirrje Komisionit Evropian që të ndërhyjë urgjentisht për të gjetur një zgjidhje të qëndrueshme dhe të ekuilibruar për sfidat që po ndikojnë në transportin ndërkombëtar dhe zinxhirët ndërkufitarë të furnizimit. “Zhvillimet e fundit, përfshirë bllokadat e kalimeve kufitare nga shoferët e kamionëve në disa shtete të rajonit, të lidhura me zbatimin e rregullave të reja të hyrjes në BE dhe sistemin EES, po pengojnë ndjeshëm lëvizjen e mallrave”, thekson Oda.

Sipas Odës Amerikane, funksionimi i pandërprerë i transportit rrugor dhe lëvizja e lirë e mallrave janë thelbësore për ruajtjen e zinxhirëve të qëndrueshëm të furnizimit, mbështetjen e aktivitetit ekonomik dhe avancimin e integrimit ekonomik me tregun unik të BE-së. Ndërprerjet tashmë po ndikojnë tek bizneset përmes vonesave në dërgesa, humbjeve financiare, rrezikut të mos përmbushjes së kontratave dhe humbjes së klientëve ndërkombëtarë.

“Duke pasur parasysh varësinë e lartë të Kosovës nga importet dhe transitimi përmes korridoreve rajonale, ndërprerjet e zgjatura rrezikojnë qëndrueshmërinë në furnizim, rrisin kostot operative për bizneset dhe mund të ndikojnë në rritjen e çmimeve për konsumatorët. Këto zhvillime ndikojnë edhe në planifikimin e investimeve dhe në detyrimet financiare të lidhura me ciklet e prodhimit dhe afatet e dorëzimit”, shtohet në njoftim.

Oda Amerikane në Kosovë inkurajon të gjitha palët e interesuara të angazhohen në dialog konstruktiv dhe të punojnë drejt zgjidhjeve praktike, të parashikueshme dhe afatgjata që sigurojnë lëvizjen e pandërprerë të mallrave, duke ruajtur integritetin e sistemeve të menaxhimit kufitar të BE-së.