I armatosur dhe në gjendje të dehur, arrestohet 46-vjeçari në Mat

Shërbimet e Komisariatit të Policisë Mat, në vijim të punës për identifikimin dhe kapjen e personave që qarkullojnë të armatosur apo mbajnë armë zjarri pa leje, organizuan operacionin pas informacioneve se një shtetas po lëvizte me automjet në gjendje të dehur dhe i armatosur.

Si rezultat, në aksin rrugor “Burrel–Komsi”, policia ndaloi një automjet tip “Volkswagen”, me të cilin udhëtonte 46-vjeçari. Gjatë kontrollit të mjetit, uniformat blu gjetën të fshehur dhe sekuestruan një armë zjarri pushkë, në cilësinë e provës materiale, si dhe automjetin.

Në përfundim të veprimeve procedurale, u arrestua në flagrancë shtetasi V.N., 46 vjeç, banues në fshatin Drita, Burrel. Ai akuzohet për veprat penale “Mbajtja pa leje dhe prodhimi i armëve, armëve shpërthyese dhe i municionit” si dhe “Drejtimi i automjetit në mënyrë të parregullt”.