Sabotime në hekurudhat italiane gjatë Lojërave Olimpike, vonesa deri në 3 orë

Vonesa të konsiderueshme prej më shumë se një ore u raportuan më herët këtë të shtunën, në linjat hekurudhore në Italinë qendrore, pas një rasti të ri sabotimi në infrastrukturën e rrjetit, gjatë zhvillimit të Lojërave Olimpike.

Rrugët midis Napolit dhe Romës u prekën, ndërsa probleme u vunë re edhe në linjën në veri, që shkon drejt Firences.

Probleme të ngjashme me rrjetin ndodhën të shtunën e kaluar, ndërsa një incident tjetër, më pak serioz, ndodhi në mes të javës. E gjithë kjo ndodhi gjatë Lojërave Olimpike Dimërore , të cilat Italia do t’i presë nga 6 deri më 22 shkurt.

“Këto janë akte të shëmtuara kriminale të drejtuara kundër punëtorëve dhe kundër Italisë. Shpresoj që askush të mos i minimizojë ose të përpiqet t’i justifikojë këto krime, të cilat vënë në rrezik jetë njerëzish”, tha në një deklaratë Ministri i Transportit, Matteo Salvini.

Autoritetet po hetojnë një incident që përfshin kabllo të djegura në pjesën e linjës së shpejtësisë së lartë midis Romës dhe Napolit, si dhe dy raste të tjera të mundshme vandalizmi në pjesën midis Romës dhe Firences .

Sakaq, policia italiane njoftoi se gjetjet fillestare tregojnë “qartësisht akte kriminale”. Zyrtarët e policisë po përgatisin një raport që do t’i dërgohet prokurorisë së Romës në orët në vijim, me qëllim nisjen zyrtarisht të procedurave penale.

Një organizatë anarkiste mori përgjegjësinë për sulmin në rrjet që shkaktoi dëme në infrastrukturën hekurudhore pranë Bolonjës të shtunën e kaluar, ditën e parë të plotë të Lojërave.

Vonesa deri në 2.5 orë u shkaktuan në linjat e rrjetit me shpejtësi të lartë, ndërqytetas dhe rajonal.