Protesta e opozitës, Rama: Mercenarët hedhin bomba artizanale të përgatitura nga udhëheqja e PD-së

Kryeministri Edi Rama në në podkastin “FLASIM” ka komentuar protestën e opozitës para Kryeministrisë më 10 shkurt. Rama i ka cilësuar protestuesit si rrugeçër me maska që paguhen për të hedhur molotovë.

Sipas tij molotovët e hedhur ndaj efektivëve të policisë janë të përgatitura nga udhëheqja e PD-së. Rama shtoi se këto protesta të dhunshme prishin imazhin e Shqipërisë.

“Kisha shumë kohë pa komentuar ndonjë protestë të opozitës. Deri kur dy javë më parë pas një përshkallëzimi të dhunshëm bëra një koment për të thënë diçka të vërtetë. Në Europë ka protestues anarkistë, huliganë, neofashistë, por qysh nga koha e partive famëkëqija në Gjermani e Itali të shumë viteve më parë, ka vetëm një parti parlamentare në Europë që të ketë pjesë të pandarë të programit të saj shkatërrimin e pronës, ushtrimin e dhunës dhe organizimin e trupava paramilitare.

Rrugeçërit e lagjes me maska paguhen për të hedhur molotovë. Mercenarët tani kanë kaluar në hedhjen e bombave të mirëfillta artizanale, të përgatitura nga udhëheqja e PD-së, që synojnë plagosjen e sa më shumë policëve. Këto protesta janë si një jashtëderdhje e plakut të lajthitur që i organizon që dalin në mediat e huaja dhe që prishin imazhin e Shqipërisë.

Në fakt ajo që po ndodh në raport me sa po themi është një degjenerim i pandalshëm. Rezultati, rrudhja e mëtejshme e një partie, e një arradheje politike që ska më asnjë mission, pëveçse të shkarkojë rropullitë e plakut. Agjë më shumë dhe asgjë, më pak. Vaj medet, pikë e zezë”, tha ai.