Grok dhe X nën hetim në Irlandë për përmbajtje problematike

Komisioni Irlandez për Mbrojtjen e të Dhënave (DPC) ka njoftuar nisjen e një hetimi ndaj chatbot-it Grok, në pronësi të X, lidhur me përpunimin e të dhënave personale dhe aftësinë e tij për të gjeneruar imazhe seksuale, përfshirë përmbajtje që mund të përfshijë të mitur.

Sipas rregullores së Bashkimi Evropian për mbrojtjen e të dhënave (GDPR), shkeljet serioze mund të ndëshkohen me gjoba deri në 4 për qind të të ardhurave globale vjetore të kompanisë.

Hetimi vjen pas kritikave të forta ndaj funksionaliteteve të Grok, i cili vitin e kaluar u lejonte përdoruesve të manipulonin imazhe të grave duke krijuar përmbajtje “deepfake” pa pëlqimin e tyre.

Raporte mediatike kanë ngritur gjithashtu shqetësime se chatbot-i mund të gjeneronte imazhe sugjestive seksuale që përfshijnë të mitur, duke shtuar presionin mbi rregullatorët për ndërhyrje të menjëhershme.

Si autoriteti kryesor mbikëqyrës për platformën X në të gjithë BE/EEA-në, DPC ka nisur një hetim të gjerë për të shqyrtuar pajtueshmërinë me detyrimet themelore të GDPR-së, veçanërisht në lidhje me përpunimin e të dhënave personale dhe masat mbrojtëse ndaj abuzimeve.

Ndërkohë, edhe Komisioni Evropian ka hapur hetime zyrtare në janar, ndërsa vende si Mbretëria e Bashkuar dhe Franca kanë paralajmëruar masa ligjore ose kanë nisur procedura hetimore.

Platforma X ka njoftuar vendosjen e kufizimeve për të parandaluar prodhimin e imazheve të tilla nga Grok, megjithatë raportet sugjerojnë se përmbajtje problematike vijon të qarkullojë.

Ky hetim pritet të shërbejë si një test i rëndësishëm për zbatimin e rregullave të BE-së ndaj inteligjencës artificiale dhe për përgjegjësinë e platformave mbi përmbajtjen e krijuar nga modelet e tyre.