Orban kërcënon të ndërpresë eksportet e energjisë elektrike dhe gazit në Ukrainë

Hungaria po shqyrton mundësinë e ndërprerjes së eksporteve të energjisë elektrike dhe gazit në Ukrainë nëse Kievi nuk rikthen rrjedhën e naftës ruse në vend nëpërmjet tubacionit Druzhba.

Kjo deklaratë e zyrës së kryeministrit hungarez, Victor Orban vjen teksa Hungaria dhe Sllovakia po përpiqen të sigurojnë furnizimet e tyre pasi rrjedhat u ndërprenë më 27 janar pas një sulmi me dron rus që Ukraina tha se dëmtoi infrastrukturën e tubacioneve.

Rafineritë planifikojnë të shfrytëzojnë rezervat shtetërore të naftës, pasi qeveria sllovake miratoi të mërkurën, një kredi prej 250,000 tonësh. Zyra e Orbanit njoftoi se qeveria hungareze gjithashtu publikoi rezervat strategjike të naftës, me kërkesë të kompanisë së rafinimit MOL.

Hungaria dhe Sllovakia akuzojnë Ukrainën për vonesë të rifillimit të flukseve për arsye politike dhe të mërkurën, njoftuan ndalimin e eksporteve të naftës në Ukrainë .

Kryeministri hungarez Viktor Orban ka qenë i hapur kundër anëtarësimit të Ukrainës në Bashkimin Evropian. Si Hungaria ashtu edhe Sllovakia kanë ruajtur marrëdhënie të mira me Presidentin rus Vladimir Putin gjatë gjithë luftës gati katërvjeçare në Ukrainë.

Qeveria e Orban beson se Ukraina po përpiqet të ndërhyjë në zgjedhjet që do të mbahen në Hungari më 12 prill, një akuzë që Kievi e ka hedhur poshtë. Orban ka qenë në pushtet për 16 vjet, por sondazhet tregojnë se ai po humbet epërsinë përpara zgjedhjeve.