Tusk thirrje qytetarëve polakë: Largohuni menjëherë nga Irani, konflikti është shumë afër

Kryeministri Donald Tusk u bëri thirrje qytetarëve polakë të largohen menjëherë nga Irani, duke paralajmëruar se “në asnjë rrethanë askush nuk duhet të udhëtojë në këtë vend”, pasi, siç tha ai, mundësia e një konflikti aktiv është “shumë, shumë afër”.

Në deklaratat e tij, kryeministri polak theksoi se një konflikt mund të shpërthejë “brenda pak, dhjetë apo edhe dhjetëra orëve të ardhshme”, duke vënë në dukje se në një zhvillim të tillë “largimi mund të mos jetë më i mundur”.

“Ju lutem merreni seriozisht këtë. Në të kaluarën, kemi pasur përvoja negative me njerëz që injoruan paralajmërime të tilla. Kjo është arsyeja pse dua ta theksoj përsëri: largohuni menjëherë nga Irani ose anuloni planet tuaja të udhëtimit. Nëse shpërthen një konflikt i hapur, askush nuk do të jetë në gjendje t’ju garantojë një dalje të sigurt”, tha kryeministri polak në një konferencë për shtyp.